លោកស្រី Sirikanya Tansakul អនុប្រធានគណបក្សចលនាឆ្ពោះទៅមុខ(MFP) បានរិះគន់លើសេចក្តីថ្លែងការណ៍គោលនយោបាយរបស់រដ្ឋាភិបាលថ្មី ដែលដឹកនាំដោយគណបក្សភឿថៃ នៅក្នុងសភាកាលពីព្រឹកថ្ងៃច័ន្ទម្សិលមិញនេះថា គ្មានភាពច្បាស់លាស់ ខ្វះគោលដៅ គ្មានសូចនាករ និងពេលវេលាជាក់លាក់ នេះបើយោងតាមកាលចុះផ្សាយរបស់កាសែតបាងកកប៉ុស្តកាលពីថ្ងៃទី ១១ ខែកញ្ញា ឆ្នាំ២០២៣។
លោកស្រី Sirikanya បាននិយាយជាការឆ្លើយតបថា សេចក្តីថ្លែងការណ៍គោលនយោបាយល្អត្រូវតែរៀបរាប់លម្អិតអំពីទិសដៅ និងវិធីសាស្រ្តដើម្បីឆ្ពោះទៅរកគោលដៅ និងពេលវេលាណាមួយក្នុងការកំណត់គោលដៅទាំងនេះឲ្យសម្រេចបាន។
អ្នកស្រី Sirikanya បាននិយាយថា “សេចក្តីថ្លែងការណ៍គោលនយោបាយរបស់លោក នាយករដ្ឋមន្ត្រី ស្រេតថា ថាវីស៊ីន នេះមិនខុសពីឯកសារដែលបានចេញផ្សាយកាលពីមុននោះទេ។ ព្រោះខ្លឹមសារមិនលម្អិត មានតែពាក្យទូលំទូលាយ ហើយថែមទាំងគ្មានសូចនាករថែមទៀតផង នេះប្រសិនបើវាជាសញ្ញា GPS វិញ មិនខុសទេ ប្រទេសថៃនឹងមានការខាតបង់” ។
លោកស្រីដែលជាអនុប្រធានរបស់គណបក្សប្រឆាំង បានសម្តែងការខកចិត្តនឹងសេចក្តីថ្លែងការណ៍គោលនយោបាយបែបនេះខ្លាំងណាស់។ វាជាការពិតណាស់ ដែលពីមុនគណបក្សភឿថៃធ្លាប់ធ្វើបានល្អប្រសើរជាមួយនឹងសេចក្តីថ្លែងការណ៍គោលនយោបាយរបស់អតីតនាយករដ្ឋមន្ត្រី លោកស្រី យីងឡាក់ ស៊ីណាវ៉ាត្រា តែប៉ុណ្ណោះ។
លោកស្រី Sirikanya បាននិយាយរំលឹកឡើងមកវិញថា សេចក្តីថ្លែងការណ៍គោលនយោបាយរបស់អតីតរដ្ឋាភិបាល គឺលោកស្រី Yingluck គឺមានគោលដៅច្បាស់លាស់ ពេលវេលាចន្លោះពីមួយទៅបួនឆ្នាំ ព្រមទាំងផ្សាភ្ជាប់ជាមួយនឹងគោលនយោបាយដែលបានប្រកាសក្នុងអំឡុងពេលធ្វើយុទ្ធនាឃោសនានៃការបោះឆ្នោតថែមទៀតផង។
លោកស្រី Sirikanya បានបន្តទៀតថា “សេចក្តីថ្លែងការណ៍គោលនយោបាយដែលល្អ គួរតែជាដំបូងមានគោលដៅច្បាស់លាស់ សូចនាករការអនុវត្តជាក់ស្តែង និងពេលវេលាជាក់លាក់ណាមួយ។ វាមិនគួរនិយាយថាប្រទេសថៃគួរជាអ្វីដោយគ្មានសូចនាករណាមួយដើម្បីបង្ហាញនោះទេ ហើយក្នុងនោះថែមទាំងនិយាយថា ប្រសិនបើប្រទេសថៃសម្រេចបាននូវគោលដៅទៅវិញ ការថ្លែងរបស់រដ្ឋាភិបាលវាមិនគួរគ្រាន់តែជា សំណេរដែលសរសេរអំពីការប្រាថ្នារបស់ខ្លួននោះទេ”។
អនុប្រធានគណបក្សចលនាឆ្ពោះទៅមុខ (MFP) បាននិយាយរិៈគន់ចំៗថា សេចក្តីថ្លែងការណ៍របស់លោក ស្រេថា ថាវីស៊ីន ទៅកាន់សភា គឺមិនមានការកំណត់ពេលវេលាសម្រាប់ការសម្រេចបាននូវគោលនយោបាយដូច ដែលបានឃោសនាមុនការបោះឆ្នោតរបស់គណបក្សភឿថៃនោះទេ។
លោកស្រីក៏បានសួរនៅក្នុងអង្គប្រជុំថា តើរដ្ឋាភិបាលខ្លួនឯងពិតជាសង្ស័យលើគោលនយោបាយរបស់ខ្លួន ឬថាគោលនយោបាយរបស់រដ្ឋាភិបាលត្រូវតែទូលំទូលាយ ពីព្រោះតែមានគណបក្សចម្រុះជាច្រើនមកពីប្លុកផ្សេងៗគ្នាច្រើនពេកមែនទេ?
លោកស្រី Sirikanya បាននិយាយថា សេចក្តីថ្លែងការណ៍មិនបានរួមបញ្ចូលអំពីគោលនយោបាយ ណាមួយដើម្បីដោះស្រាយបញ្ហា ដែលកំពុងតែកើតឡើងនៅក្នុងខេត្តជាប់ព្រំដែនភាគខាងត្បូងនោះទេ។ បន្ទាប់មកលោកស្រីបានសួរថា តើបញ្ហានៅប៉ែកខាងត្បូងវាមិនមែនជារឿងបន្ទាន់ទេ?
លោកស្រីក៏បាន រិៈគន់លើរដ្ឋាភិបាលថ្មីលើការសន្យារបស់ភឿថៃមួយទៀតថា លោកត្រូវតែធានាថា ខ្លួនត្រូវតែមានប្រាក់គ្រប់គ្រាន់ដើម្បីគាំទ្រការប្រគល់ប្រាក់តាមប្រព័ន្ធឌីជីថលចំនួន 560 ពាន់លានបាតរបស់ខ្លួនផងដែរ។ ដោយលោកស្រី Sirikanya បាននិយាយបន្ថែមថា ប្រសិនបើគ្មានលុយពិតប្រាកដដើម្បីគាំទ្រគោលនយោបាយនោះ វាអាចបណ្តាលឱ្យមានអតិផរណានៅក្នុងពិភពនៃប្រាក់ឌីជីថល និងអង្រួនទំនុកចិត្តរបស់ម្ចាស់ហាងក្នុងស្រុកដែលបានជឿទុកចិត្តលើលោក។
លោកស្រីបាននិយាយជាចុងក្រោយថា បើគ្មានការដោះស្រាយឫសគល់ រួមទាំងក្រុមមូលធននិយម ដែលមានអំណាចផ្តាច់មុខនោះទេ បញ្ហាសេដ្ឋកិច្ចថៃមិនអាចដោះស្រាយដោយនិរន្តរភាពបានទេ។
សម្រាប់លោកស្រីផ្ទាល់ លោកស្រីតែបានរំពឹងទុកថា រដ្ឋាភិបាលនឹងផ្តល់ព័ត៌មានលម្អិតអំពីគោលនយោបាយរបស់ខ្លួននៅក្នុងរបាយការណ៍ថវិកាជាតិរបស់ខ្លួនឲ្យបានច្បាស់លាស់។
