ក្រុមហ៊ុន SpaceX របស់មហាលសេដ្ឋីលំដាប់ពិភពលោក Elon Musk បានផ្តួចផ្តើមគំនិតដើម្បីពិភាក្សាអំពីការលក់ភាគហ៊ុនដែលមានស្រាប់របស់ខ្លួន ពោលគឺមានតម្លៃប្រហែលជា 200 ពាន់លានដុល្លារសហរដ្ឋអាមេរិក នេះបើយោងតាមមនុស្សមួយក្រុមដែលដឹងពីបញ្ហានេះ បាននិយាយប្រាប់ Bloomberg កាលពីថ្ងៃទី ២៣ ខែឧសភា ឆ្នាំ២០២៤។
មនុស្សមួយក្រុមដែលសុំមិនបញ្ចេញអត្តសញ្ញាណបាននិយាយបន្តទៀតថា ក្រុមហ៊ុន SpaceX កំពុងពិភាក្សាអំពីការផ្តល់ជូននូវតម្លៃមួយដែលអាចឱ្យបុគ្គលិក និងអ្នកខាងក្នុងដូចជាអ្នកវិនិយោគលក់ភាគហ៊ុនអាចមានឪកាសចាប់ផ្តើមមុនគេចាប់ពីខែមិថុនាខាងមុខនេះ។ ប្រភពដដែលបានបន្តថា ថ្វីត្បិតតែព័ត៌មានខាងលើនេះ វាគឺជាការសម្ងាត់ក៏ពិតមែន តែពួកគេអាចដឹងថា គម្រោងនៃការដាក់ភាគហ៊ុនរបស់ក្រុមហ៊ុន SpaceX វាមិនអាចប្រព្រឹត្តិទៅបាននោះទេ ព្រោះបើយោងទៅតាមអ្នកជំនាញរបស់ក្រុមហ៊ុនបានឲ្យដឹងថា ប្រសិនបើក្រុមហ៊ុន SpaceX ចង់លក់ភាគហ៊ុននោះ តម្លៃដែលយើងអាចផ្តល់ក្នុងមួយភាគហ៊ុនគឺត្រូវតែច្រើនជាង ១០៧ ដុល្លា។
តែបើទោះជាយ៉ាងណាក៏ដោយ លោក Elon Musk បានបង្ហោះនៅលើ X ដោយយោងទៅលើការផ្តល់ជូនលោកបានកំណត់ថា “ក្រុមហ៊ុននឹងធ្វើការទូទាត់សាច់ប្រាក់សម្រាប់បុគ្គលិក និងអ្នកវិនិយោគរៀងរាល់ 6 ខែម្តង” ។ ដោយលោកបានសង្កត់ធ្ងន់ទៀតថា ក្រុមហ៊ុន SpaceX មិនត្រូវការដើមទុនបន្ថែមទៀតនោះទេ ហេតុដូច្នេះហើយក្រុមហ៊ុនអាចនឹងយកភាគហ៊ុនរបស់ខ្លួនត្រឡប់មកវិញឲ្យបានឆាប់បំផុត។
គួរបញ្ជាក់ថា ចំពោះគម្រោងនៃទឹកប្រាក់ដែលក្រុមហ៊ុនប្រកាសលក់ភាគហ៊ុនក្នុងតម្លៃប្រមាណ 200 ពាន់លានដុល្លារ វានឹងក្លាយជាបុព្វលាភសម្រាប់តម្លៃ 180 ពាន់លានដុល្លារដែលក្រុមហ៊ុនទទួលបានតាមរយៈការដេញថ្លៃចុងក្រោយបំផុតរបស់ខ្លួន។ បន្ទាប់មកក្រុមហ៊ុន SpaceX គឺវានឹងមានតម្លៃស្មើគ្នាជាមួយនឹងក្រុមហ៊ុនធំៗមួយចំនួនរបស់ពិភពលោក ដែលធ្វើការជួញដូរជាសាធារណៈដោយមូលធនប័ត្រទីផ្សារ។
បច្ចុប្បន្ន ចំពោះពត៌មានខាងលើវានៅតែជាពាក្យចចាមរ៉ាមនៅឡើយទេ តែក្រុមការងាររបស់ Bloomberg កំពុងព្យាយាមទាក់ទងទៅកាន់តំណាងក្រុមហ៊ុន SpaceX ដែលត្រូវបានគេស្គាល់ជាផ្លូវការថា Space Exploration Technologies Corp. មិនបានឆ្លើយតបភ្លាមៗចំពោះសំណើសុំការអត្ថាធិប្បាយទេ។
