បន្ទាប់ពី គ្រោះទឹកជំនន់មួយបានកើតឡើងនៅក្នុងទីក្រុងឌូបៃកាលពីខែមេសារួចមក ប្រធានាធិបតីរបស់ អារ៉ាប់រួម (UAE) បានប្រកាសថា ខ្លួននិងរៀបចំសម្អាតផ្លូវ និងប្រព័ន្ធលូរបស់ខ្លួនទាំងអស់ ដោយគិតជាការចំណាយទាំងអស់ប្រហែលជា30 ពាន់លាន AED (8 ពាន់លានដុល្លារ) ។
បើយោងតាមការចុះផ្សាយពី AGBI កាលពីថ្ងៃទី ២៧ ខែមិថុនា ឆ្នាំ២០២៤ បានឲ្យដឹងថា ដើម្បីធានាបាននៅគុណភាពប្រព័ន្ធលូ ថ្នាក់ដឹកនាំរបស់អារ៉ាប់រួមបានសង្កត់ធ្ងន់ថា ប្រព័ន្ធលូរបស់អេមីរ៉េតគឺត្រូវតែអាចទប់ទល់នឹងភ្លៀងបានច្រើនជាង 20 លានម៉ែត្រគូបក្នុងមួយថ្ងៃ។
គួរបញ្ជាក់ថា ចំពោះការងារលើគម្រោងការពារទឹកជំនន់ដែលមានឈ្មោះថា Tasreef ពួកគេនឹងចាប់ផ្តើមអនុវត្តភ្លាមៗ ដើម្បីបញ្ចប់ការសាងសង់គម្រោងខាងលើនេះយ៉ាងយូបំផុតត្រឹមរយៈពេល 9 ឆ្នាំ។
យ៉ាងណាមិញសម្រាប់ការចំណាយពេលវេលាប្រាំបួនឆ្នាំដើម្បីបញ្ចប់គម្រោងដ៏ធំមួយនេះ បើយោងតាមការរៀបរាប់អ្នកគ្រប់គ្រងរបស់អេមីរ៉ាតផ្ទាល់ គឺលោក Sheikh Mohammed បាឲ្យដឹងថា ក្រុមអ្នកសាងសង់នឹងប្រើប្រាស់ម៉ាស៊ីនខួងផ្លូវរូងក្រោមដីដែលថ្មី និងបំផុត ហើយក៏ជាម៉ាស៊ីដែលធំជាងគេបំផុតនៅក្នុងតំបន់មជ្ឈិមបូព៌ាថែមទៀតផង។
បន្ថែមពីការប្រើប្រាស់ឧបករណ៍ ក្នុងនោះមានមន្រ្តីជាន់ខ្ពស់ម្នាក់ដែលមានឈ្មោះថា Nariba Gittens លោកបាននិយាយប្រាប់ AGBI បន្ថែមថា “ចំពោះគម្រោងខាងលើនេះ គឺយើងបានរំពឹងទុកថា រាល់ហេដ្ឋារចនាសម្ព័ន្ធនៅខាងក្រោមដីទាំងអស់ វាត្រូវបានក្រុមអ្នកជំនាញរបស់យើងបានបង្កប់បំពង់ទឹកគ្រប់ជ្រុងជ្រោយ គឺចេញពីស្ថានីយ៍បូមទឹក រួចក៏បង្ហូរទៅកាន់ស្រះទឹក និងសមុទ្រជាដើម។
លោកបានមានប្រសាសន៍បន្តទៀតថា ការរៀបចំនូវប្រព័ន្ធទឹកឡើងមកវិញបែបនេះ គឺយើងត្រូវតែជួបនឹងបញ្ហាប្រឈមជាច្រើន តួរយ៉ាងដូចជា៖ ការសង់ត្រលប់ក្រោយនៅក្នុងតំបន់ដែលបានសាងសង់រួចហើយនៃទីក្រុងឌូបៃ ហើយជាពិសេសគឺនៅខាងក្រោមដីតំបន់មួយនេះ គឺវាមានផលលំបាកច្រើន ព្រោះថាការសាសង់ប្រព័ន្ធខាងក្រោមក្នុងតំបន់ទាំងនោះគឺភាគច្រើនពួកយើងនៅមានកម្រិតក្នុងការសាងសង់ផងដែរ។”
គួរបញ្ជាក់ថា ឌូបៃវាគឺជាទីក្រុងមួយដែលបានទាក់ទាញបំផុតបន្ទាប់ពីមានជំងឺរាតត្បាតកូវីដ ១៩ កន្លងមក។ ឌូបៃបានបានក្លាយទៅជាកន្លែងដែលមានការប្រមូលផ្តុំក្រុមអ្នកមានទ្រព្យសម្បត្តិឲ្យមកទស្សនា ក៏ដូចជាការមករស់នៅបានច្រើនជាងគេ។ ជាការពិតណាស់ អ្វីទាំងអស់នេះ វាក៏ព្រោះតែប្រទេសមួយនេះមានថ្នាក់ដឹកនាំមួយដែលពោពេញទៅដោយភាពច្នៃប្រឌិតខ្ពស់ ជាឧទាហរណ៍ដូចជាការបង្កើតឲ្យមានភ្លៀងសិប្បនិមិតដើម្បីជួយដល់តំបន់ដែលបានជួបគ្រោះរាំងស្ងួត ការអនុគ្រោះពន្ធចំពោះអ្នកវិនិយោគថ្មីៗជាដើមនោះ វាក៏បានធ្វើឲ្យមានក្រុមអ្នកវិនិយោគជាច្រើននៅក្នុងពិភពលោក បានសង្វាត់មកបន្តាក់ទុននៅក្នុងប្រទេសមួយនេះកាន់តែច្រើន។
