ទីភ្នាក់ងារព័ត៌មាន Reuters នៅថ្ងៃព្រហស្បតិ៍ បាននិយាយថាមានការបង្ហាញពីស្រទាប់ខ្យល់កខ្វក់ដែលចេញមកពីភ្លើងឆេះព្រៃរបស់ប្រទេសកាណាដា វាក៏បានរុញច្រានបន្ថែមពីលើមហាសមុទ្រអាត្លង់ទិក ដែលត្រូវបានគ្របដណ្តប់លើទីក្រុងវ៉ាស៊ីនតោន ក្នុងអ័ព្ទផ្សែងពណ៌ខ្មៅ ហើយវាបានជំរុញឱ្យអ្នកស្រុកជាច្រើននៃរដ្ឋធានីរបស់សហរដ្ឋអាមេរិកត្រូវស្នាក់នៅក្នុងផ្ទះជាបណ្តោះអាសន្ន។
ចរាចរណ៍នៃរថភ្លើងមានមនុស្សតិចជាងធម្មតា ខណៈដែលក្រុមហ៊ុនជាច្រើននៅក្នុងទីក្រុងបានប្រាប់បុគ្គលិកឱ្យធ្វើការពីផ្ទះ។ ចំនែកសេវាមួយចំនួនដែលមិនសូវសំខាន់ត្រូវបានផ្អាកដំណើរការ រួមទាំងសួនកម្សាន្ត ការសាងសង់ផ្លូវ និងការប្រមូលសំរាមជាដើម។
ក្រុមកីឡា Baseball របស់ Washington Nationals បានផ្អាកការប្រកួត ខណៈដែលសួនសត្វជាតិក៏ត្រូវបានបិទរយៈមួយថ្ងៃ។ ក្រុមរដ្ឋបាលរបស់លោក Joe Biden បានពន្យារពេលព្រឹត្តិការណ៍ Pride Month របស់ខ្លួន ដែលត្រូវបានគេរំពឹងថាជាការប្រារព្ធពិធីដ៏ធំបំផុតសម្រាប់មនុស្ស LGBTQ+ នៅក្នុងប្រវត្តិសាស្ត្ររបស់សេតវិមាន។
ចំពោះករណីដែលកំពុងតែកើតឡើងនៅពេលនេះ គឺបណ្តាលមកពីផ្សែងភ្លើងនៃការឆេះព្រៃនៅក្នុងប្រទេសកាណាដា ហើយវាបានជះឥទ្ធិលមកលើតំបន់ភាគឦសានរបស់សហរដ្ឋអាមេរិក នេះបើយោងតាមសេវាកម្មព្យាករណ៍ឯកជន AccuWeather ។
សម្រាប់ទីភ្នាក់ងារអាកាសធាតុជាតិរបស់សហរដ្ឋអាមេរិក បានពង្រីកការជូនដំណឹងស្តីអំពីស្ថានភាពខ្យល់ដែលមានលាយឡំនិងផ្សែងភ្លើង គឺបក់ពីរដ្ឋ New England ទៅកាន់រដ្ឋ South Carolina ក៏ដូចជាផ្នែកខ្លះនៃតំបន់ Midwest រួមទាំងរដ្ឋ Ohio រដ្ឋ Indiana និងរដ្ឋ Michigan ផងដែរ។ បើយោងតាមក្រុមអ្នកវិទ្យាសាស្ត្រដែលតាមដានកម្រិតនៃភាគល្អិតនៅ Scandinavia បានឱ្យដឹងថា ផ្សែងប្រភេទនេះអាចបក់បានឆ្ងាយ និងអាចទៅដល់ប្រទេសន័រវេសក្នុងថ្ងៃព្រហស្បតិ៍។
ប្រជាជនជាតិអាមេរិករាប់លាននាក់ ត្រូវបានគេណែនាំឱ្យស្នាក់នៅក្នុងផ្ទះប្រសិនបើអាចធ្វើទៅបានដើម្បីជៀសវាងបញ្ហាផ្លូវដង្ហើម និងបញ្ហាសុខភាពផ្សេងទៀត ដែលអាចកើតឡើងដោយសារតែកម្រិតនៃភាគល្អិតមិនល្អនៅក្នុងបរិយាកាស។
ចំពោះទីក្រុងវ៉ាស៊ីនតោនកាលពីព្រឹកថ្ងៃព្រហស្បតិ៍ ទិន្នន័យរបស់រដ្ឋាភិបាលបានបង្ហាញពីកម្រឹតនៃខ្យល់គឺលើសពី “គ្រោះថ្នាក់” ទៅទៀត។
លោក Marvin Binnick ដែលបានផ្លាស់ទៅ Washington ពីរដ្ឋ Nebraska កាលពីមួយខែមុន បាននិយាយថា ការមើលផ្សែងភ្លើងឆេះព្រៃចូលទៅក្នុងរដ្ឋធានីរបស់ប្រទេស ដោយមើលពីផ្ទះល្វែងជាន់ទី 12 របស់គាត់គឺពិតជាខ្លាំងក្លាណាស់។
លោក Marvin Binnick ដែលត្រូវបានគេឲ្យបញ្ជូនទៅផ្ទះ បន្ទាប់ពីការងារបម្រើអតិថិជនរបស់គាត់នៅព្រឹកថ្ងៃព្រហស្បតិ៍បាននិយាយថា “នេះត្រូវបានគេសន្មត់ថាជាថ្ងៃដែលមានពន្លឺថ្ងៃធម្មតា ប៉ុន្តែខ្ញុំមិនអាចមើលឃើញមេឃ ឬព្រះអាទិត្យ ឬអ្វីនោះទេ” ។ “ជាធម្មតា DC មានភាពលេចធ្លោណាស់ ប៉ុន្តែនៅពេលខ្ញុំទៅធ្វើការ និងតាមផ្លូវទៅផ្ទះថ្ងៃនេះ វាមើលទៅដូចជាទីក្រុងខ្មោចទៅវិញ”។
នៅក្នុងពេលនេះមានមនុស្សជាច្រើនបានពាក់ម៉ាស់ពេលនៅខាងក្រៅ ខណៈដែលមានផ្សែងខ្មៅក្រាស់បានបាំងរាជធានី។ ផ្សែងអ័ព្ទក្រាស់ដែលហុយចេញពីផេះបានលុបទិដ្ឋភាពពីលើវិមានរបស់ Washington ផងដែរ។
អភិបាលក្រុង Washington លោក Muriel Bowser បាននិយាយថា “បញ្ហានេះទំនងជានឹងបន្ត ឬកាន់តែអាក្រក់ឡើងរហូតដល់ថ្ងៃសុក្រ” ។ «យើងសូមអំពាវនាវដល់ប្រជាពលរដ្ឋ និងភ្ញៀវទេសចរទាំងអស់ឲ្យអនុវត្តការប្រុងប្រយ័ត្នកាន់តែខ្ពស់»។
