ខេត្ត Gyeonggi និងតំបន់ផ្សេងទៀតនៅភាគកណ្តាលនៃប្រទេសកូរ៉េខាងត្បូង ត្រូវបានវាយប្រហារដោយភ្លៀងធ្លាក់យ៉ាងខ្លាំងកាលពីថ្ងៃព្រហស្បតិ៍។ រដ្ឋបាលឧតុនិយមកូរ៉េ (KMA) បានចេញសេចក្តីប្រកាសមួយ ដែលជាការឃ្លាំមើលនៃកម្រឹតទឹកភ្លៀងនៅក្នុងទីក្រុង Seoul, Incheon និងខេត្ត Gyeonggi ក៏ដូចជាខេត្ត Chungcheong ខាងជើង និងខាងត្បូង និង North Jeolla ដោយក្នុងតំបន់ទាំងនេះគឺមានភ្លៀងធ្លាក់ចន្លោះពី 30 ទៅ 50 មិល្លីម៉ែត្រក្នុងមួយម៉ោង ពេញរយៈមួយថ្ងៃ។
ការព្រមានអំពីភ្លៀងធ្លាក់ខ្លាំង ត្រូវបានប្រកាសចេញសម្រាប់ទីក្រុង Chuncheon ក្នុងខេត្ត Gangwon ខណៈដែលទីក្រុងនេះបានជួបប្រទះនឹងភ្លៀងធ្លាក់រហូតដល់ទៅ 60 មីលីម៉ែត្រក្នុងមួយម៉ោង។
អាជ្ញាធរខេត្ត Gyeonggi ទទួលបន្ទុករដ្ឋបាល អូរ ភ្នំ និងកសិកម្ម បានផ្តួចផ្តើមការងារសង្គ្រោះបន្ទាន់ ដោយចាប់ផ្តើមពីម៉ោង 7:30 ព្រឹក ដើម្បីតាមដានស្ថានភាពអាកាសធាតុ ដើម្បីជាប្រយោជន៍ដល់សុវត្ថិភាពជាសាធារណៈ។
អភិបាលខេត្ត Gyeonggi លោក Kim Dong-yeon បាននិយាយថា “ការគ្រប់គ្រងទុកជាមុនមានសារៈសំខាន់ណាស់ ក្នុងការទប់ស្កាត់នៃការបាត់បង់អាយុជីវិត” ។ ជាពិសេស មន្ត្រីគួរតែយកចិត្តទុកដាក់បន្ថែមទៀត ដើម្បីត្រួតពិនិត្យលំនៅឋានក្រោមដី ឬចំណតរថយន្ត ហើយមន្ត្រីត្រូវបន្ថែមការយកចិត្តទុកដាក់សម្រាប់ជនពិការ និងជនចាស់ជរា ដែលរស់នៅម្នាក់ឯង។ ព្រោះការព្រមានអំពីអាកាសធាតុ ត្រូវបានគេព្យាករណ៍ថា នឹងពង្រីកទៅកាន់តំបន់ផ្សេងទៀត ដោយសារកម្រឹតទឹកភ្លៀង ហើយនឹងប៉ះពាល់ដល់តំបន់ភាគខាងត្បូងរហូតដល់ថ្ងៃសុក្រថែមទៀតផង។
KMA បាននិយាយថា ភ្លៀងធ្លាក់ខ្លាំង គឺមានកម្រិតអតិបរមា 250 មីលីម៉ែត្រ ត្រូវបានរំពឹងទុកពេញមួយថ្ងៃសុក្រ សម្រាប់ខេត្ត Gwangju ភាគខាងត្បូង និងខាងជើង Jeolla ក៏ដូចជាកោះ Jeju ។
ផ្នែកខាងជើងនៃខេត្ត Gyeonggi ក៏ត្រូវបានគេរំពឹងថានឹងឃើញអតិបរមា 200 មីលីម៉ែត្រផងដែរ។ ក្តីបារម្ភកាន់តែខ្លាំងឡើងថា តំបន់ភាគខាងត្បូងដែលរងការវាយប្រហារដោយភ្លៀងធ្លាក់ខ្លាំងដែលបណ្តាលឱ្យមានទឹកជំនន់ និងការដាច់ចរន្តអគ្គិសនីនៅដើមសប្តាហ៍នេះ អាចទទួលរងការខូចខាតបន្ថែម។ ចាប់ពីម៉ោង 4 រសៀលថ្ងៃអង្គារដល់ម៉ោង 5 ព្រឹកថ្ងៃព្រហស្បតិ៍ ទីក្រុង Gwangju ទទួលបានទឹកភ្លៀង 274.6 មីលីម៉ែត្រ ខណៈដែល Damyang និង Hwasun ក្នុងខេត្ត South Jeolla ទទួលបានទឹកភ្លៀង 217.5 មីលីម៉ែត្រ និង 207.5 មីលីម៉ែត្ររៀងគ្នា។ Hampyeong ក្នុងខេត្តដូចគ្នា ដែលទទួលទឹកភ្លៀងក្នុងកម្រឹត 196 មិល្លីម៉ែត្រក្នុងអំឡុងពេលដែលបានរៀបរាប់ខាងលើបានរាយការណ៍ពីការស្លាប់ដំបូង។
បើយោងតាមអាជ្ញាធរពន្លត់អគ្គីភ័យក្នុងតំបន់នោះ ស្ត្រីម្នាក់ដែលមានអាយុ 60 ឆ្នាំដែលបានបាត់ខ្លួនបន្ទាប់ពីនាងបានចេញពីផ្ទះកាលពីយប់ថ្ងៃអង្គារ គឺត្រូវបានគេរកឃើញថាបានស្លាប់នៅម៉ោង 10 និង 37 នាទីព្រឹកថ្ងៃព្រហស្បតិ៍ ស្ត្រីរូបនេះមានមុខរបរ ជាអ្នកថែទាំកន្លែងហែលទឹក។
នៅខេត្ត Jeolla ខាងត្បូង និងខាងជើង មានផ្ទះយ៉ាងតិចប្រាំបីខ្នង និងអគារពាណិជ្ជកម្មចំនួនបីត្រូវបានជន់លិច ខណៈដីស្រែជាង 4,000 ហិកតាត្រូវបានខូចខាតនៅក្នុងខេត្តទាំងនោះ គឺខេត្ត Gwangju និងខេត្ត Gyeongsang ខាងត្បូង។
អាជ្ញាធរអាកាសធាតុបានណែនាំប្រជាពលរដ្ឋ កុំឱ្យទៅជិតអូរ ជ្រលងភ្នំ និងកន្លែងក្រោមដី ព្រោះភ្លៀងធ្លាក់ខ្លាំងអាចបណ្តាលឱ្យមានទឹកជំនន់ភ្លាមៗ។
ព្រោះរដូវកាលនេះគឺពេលដែលមានភ្លៀងធ្លាក់ជាបន្តបន្ទាប់ សម្រាប់សេវាព្រៃឈើរបស់ប្រទេសកូរ៉េបានបង្កើនការជូនដំណឹងអំពីការរអិលបាក់ដីដល់កម្រិត “ការប្រុងប្រយ័ត្ន” កម្រឹតទីពីរ “ការយកចិត្តទុកដាក់” ទាបបំផុតនៅក្នុងមាត្រដ្ឋានព្រមានបួនកម្រិតរបស់វា។ មន្ត្រីម្នាក់មកពីសេវាព្រៃឈើកូរ៉េបាននិយាយថា “មានគ្រោះថ្នាក់ខ្លាំងនៃការរអិលបាក់ដីដោយសារតែភ្លៀងធ្លាក់ដែលត្រូវបានគេព្យាករណ៍ទុកមុន” ។ យើងសូមណែនាំប្រជាជនឱ្យចេញពីភ្នំ ហើយចៀសវាងសកម្មភាពនៅខាងក្រៅ។
បើយោងតាម KMA ភ្លៀងទំនងជានឹងធ្លាក់ចុះនៅចុងសប្តាហ៍ ប៉ុន្តែចាប់ផ្តើមឡើងវិញនៅដើមសប្តាហ៍ក្រោយ។
