ប្រធានសភាលោក Wan Muhamad Noor Matha បាននិយាយថា សភា និងព្រឹទ្ធសភាបានរួមគ្នាបានបោះឆ្នោតច្រានចោលការតែងតាំងប្រធានគណបក្សចលនាឆ្ពោះទៅមុខ (MFP) លោក Pita Limjaroenrat ជានាយករដ្ឋមន្ត្រី ដោយសារតែបទប្បញ្ញត្តិរបស់សភាបានហាមឃាត់រូបលោក។
លោក Wan បានធ្វើសេចក្តីប្រកាសមួយនេះឡើង គឺបន្ទាប់ពីសមាជិកសភាចំនួន 715 នាក់បានបោះឆ្នោតតាមប្រព័ន្ធអេឡិចត្រូនិចនៅម៉ោង 5.10 ល្ងាចថ្ងៃពុធ។ ប្រធានសភាបានកោះហៅអ្នកមានសិទ្ធិក្នុងការបោះឆ្នោត បន្ទាប់ពីការជជែកដេញដោលយ៉ាងយូរលើបញ្ហានេះ ដែលបានចាប់ផ្តើមភ្លាមៗ បន្ទាប់ពីកិច្ចប្រជុំបានបើកនៅម៉ោង 9.30 ព្រឹក។
នៅក្នុងការអង្គុយរួមគ្នានេះ សមាជិកសភាចំនួន 395 នាក់បានបោះឆ្នោតប្រឆាំងនឹងការតែងតាំងរបស់លោក Pita ហើយមានចំនួន 312 បានបោះឆ្នោតគាំទ្រលោក និង 8 អនុប្បវាទ ហើយមានម្នាក់ត្រូវបានដកសិទ្ធិចេញពីការបោះឆ្នោត។
លោក Wan បាននិយាយថា ការបដិសេធនេះគឺធ្វើឡើងដោយសំឡេងភាគច្រើន ពីព្រោះពាក់កណ្តាលនៃការបោះឆ្នោតរួមគ្នាគឺ 374 ។ ចំនួននេះត្រូវបានកែតម្រូវបន្ទាប់ពី Pita ត្រូវបានព្យួរពីតួនាទីជាសមាជិកសភាដោយតុលាការធម្មនុញ្ញកាលពីព្រឹកមិញ។
មុនពេលបោះឆ្នោត សមាជិកសភាបានចំណាយពេលជាច្រើនម៉ោងដើម្បីជជែកគ្នាថា តើការតែងតាំងត្រូវបានអនុញ្ញាតឬក៏អត់នោះ។
តែក្រុមអ្នកប្រឆាំងបាននិយាយថា បទប្បញ្ញត្តិនៃសម័យប្រជុំសភាលេខ ៤៩ បានហាមឃាត់ការបញ្ជូនសំណើដែលបរាជ័យទៅសភាឡើងវិញក្នុងអំឡុងពេលសម័យប្រជុំសភាដូចគ្នា។ ពួកគេបាននិយាយថា ការតែងតាំងរបស់លោក Pita ត្រូវបានច្រានចោលកាលពីសប្តាហ៍មុន ហើយមិនមានការអភិវឌ្ឍន៍ថ្មី ដែលអាចបង្ហាញពីភាពត្រឹមត្រូវនៃការដាក់ស្នើឡើងវិញនោះទេ។
សមាជិកសភា Pro-Pita បានសង្កត់ធ្ងន់ថា បទប្បញ្ញត្តិអនុវត្តចំពោះចលនាទូទៅ និងមិនមែនទៅលើការតែងតាំងនាយករដ្ឋមន្ត្រីនោះទេ។ ដោយពួកគេក៏បាននិយាយផងដែរថា សមាជិកសភាគួរតែគោរពជម្រើសដែលបានធ្វើឡើងដោយអ្នកបោះឆ្នោតនៅក្នុងការបោះឆ្នោតសកលនៅថ្ងៃទី 14 ខែឧសភា។
គណបក្ស Move Forward របស់លោក Pita បានឈ្នះការបោះឆ្នោតជាមួយនឹងអាសនៈសភាចំនួន 151 ។ ហើយនាពេលថ្មីៗនេះផងដែរ លោក Pita បាននិយាយថា លោកនឹងបើកផ្លូវឲ្យគណបក្សភឿថៃតែងតាំងនាយករដ្ឋមន្ត្រីប្រសិនបើការការបោះឆ្នោតជុំទី 2 លោកទទួលបរាជ័យ។ គណបក្សភឿថៃបានទទួលអាសនៈសភាចំនួន ១៤១ ហើយគណបក្សទាំងពីរគឺជាសមាជិកសំខាន់ៗនៃសម្ព័ន្ធទាំងប្រាំបីនៃគណបក្សផងដែរ។
