យោងតាមទីភ្នាក់ងារសារព័ត៌មានរ៉យទ័រនៅទី 25 ខែសីហា ឆ្នាំ 2023 បានឲ្យដឹងថា ក្រុមហ៊ុនផលិតស្រាបៀរ របស់ប្រទេសហូឡង់ ដែលមានឈ្មោះថា Heineken (HEIN.AS) បាននិយាយកាលពីថ្ងៃសុក្រថា ខ្លួនបានបញ្ចប់កុងត្រា នឹងការចាកចេញពីប្រទេសរុស្ស៊ី ដោយលក់ប្រតិបត្តិការរបស់ខ្លួននៅទីនោះទៅឱ្យក្រុមហ៊ុន Arnest Group របស់រុស្ស៊ីក្នុងតម្លៃមួយនិមិត្តសញ្ញា គឺមួយអឺរ៉ូ។
ក្រុមហ៊ុនផលិតស្រាបៀរដ៏ធំបំផុតទីពីររបស់ពិភពលោកបាននិយាយថា កិច្ចព្រមព្រៀងនេះបានទទួលការយល់ព្រមតាមតម្រូវការទាំងអស់ ហើយក្រុមហ៊ុន Heineken ផ្ទាល់ក៏ទំនងជានឹងមានការខាតបង់ពិសេសចំនួន 300 លានអឺរ៉ូ (324,8 លានដុល្លារ) ។
Heineken បានប្រកាសពីចេតនារបស់ខ្លួនក្នុងការចាកចេញពីប្រទេសរុស្ស៊ីនៅខែមីនាឆ្នាំ 2022 បន្ទាប់ពីការលុកលុយរបស់រុស្ស៊ីលើអ៊ុយក្រែន ដោយទទួលស្គាល់ថាដំណើរការនេះបានចំណាយពេលយូរជាងការរំពឹងទុក។
នាយកប្រតិបត្តិលោក Dolf van den Brink បាននិយាយនៅក្នុងសេចក្តីថ្លែងការណ៍មួយថា “ការអភិវឌ្ឍន៍ថ្មីៗបង្ហាញពីបញ្ហាប្រឈមសំខាន់ៗ ដែលក្រុមហ៊ុនផលិតកម្មធំៗប្រឈមមុខក្នុងការចាកចេញពីប្រទេសរុស្ស៊ី” ។
ក្រុមហ៊ុនពហុជាតិសាសន៍ជាច្រើនបានសម្រុកចាកចេញពីប្រទេសរុស្ស៊ី បន្ទាប់ពីលោកខាងលិចបានដាក់ទណ្ឌកម្មដែលមិនធ្លាប់មានពីមុនមកលើទីក្រុងម៉ូស្គូ។
ក្រុមហ៊ុនបរទេសមួយចំនួនដែលព្យាយាមចាកចេញពីប្រទេសរុស្ស៊ី ព្រោះពួកគេទាំងនោះកំពុងប្រឈមមុខនឹងការកើនឡើងនៃថ្លៃដើម ខណៈដែលទីក្រុងម៉ូស្គូកំពុងទាមទារឱ្យ មានការបញ្ចុះតម្លៃកាន់តែច្រើន លើស្លាកតម្លៃនៃទ្រព្យសកម្មដែលពួកគេចង់លក់។ មនុស្សបីនាក់ដែលមានចំណេះដឹងអំពីបញ្ហានេះបាននិយាយថា ប្រធានាធិបតីរុស្ស៊ី លោក វ្ល៉ាឌីមៀ ពូទីន បានចុះហត្ថលេខាលើ ឯកសារមួយកាលពីខែ កក្កដា ដើម្បីគ្រប់គ្រងក្រុមហ៊ុនបុត្រសម្ព័ន្ធរបស់រុស្ស៊ី Danone’s (DANO.PA) រួមជាមួយក្រុមហ៊ុនស្រាបៀរ Carlsberg’s (CARLb.CO) ។
ក្នុងនោះ លោក Anheuser-Busch InBev ក៏បាននិយាយផងដែរថា ខ្លួន គ្រោងនឹងចាកចេញពីការបណ្តាក់ទុនរួមគ្នារបស់ខ្លួន នៅក្នុងប្រទេសរុស្ស៊ីជាមួយ Efes របស់ប្រទេសទួរគី (AEFES.IS) ។
នៅពេលសួរថា តើបទពិសោធន៍របស់ Danone និង Carlsberg បានបង្កើនភាពបន្ទាន់សម្រាប់ Heineken ក្នុងការធ្វើកិច្ចព្រមព្រៀងមួយឬអត់ លោក van den Brink បានប្រាប់អ្នកយកព័ត៌មានថា “ការព្រួយបារម្ភរបស់យើងបានកើនឡើង ប៉ុន្តែមិនមែនជាភាពបន្ទាន់នោះទេ។ វាបង្ហាញថាមានហានិភ័យនៃការធ្វើតូបនីយកម្មពិតប្រាកដ ហើយអ្វីដែលអ្នកអាចធ្វើបានគឺ ព្យាយាមធ្វើជាម្ចាស់នៃជោគវាសនារបស់អ្នក” ។
ហើយលោកនឹងមិនចូលទៅក្នុងព័ត៌មានលម្អិតអំពីមូលហេតុ ដែលការស្វែងរកអ្នកទិញចំណាយពេលយូរជាងការរំពឹងទុក ដោយហៅដំណើរការនេះថា “ជាការស្មុគស្មាញខ្លាំង”។
លោកបានបន្ថែមថា “យើងរីករាយដែលយើងបានរកឃើញអ្នកទិញសមរម្យ។ យើងជឿថា ពួកគេ គឺជាភាគី ដែលអាចទុកចិត្តបាន យើងសប្បាយចិត្តដែលដំណើរការនេះឈានដល់ទីបញ្ចប់ ហើយដើម្បីអាចចាកចេញពីប្រទេសរុស្ស៊ីបាន” ។
ក្រុមហ៊ុន Heineken មានរោងចក្រផលិតស្រាបៀរចំនួនប្រាំពីរនៅក្នុងប្រទេសរុស្ស៊ី និងបុគ្គលិកចំនួន 1,800 ដែលនឹងទទួលបានការធានាការងារសម្រាប់រយៈពេលបីឆ្នាំខាងមុខ។
ក្រុមហ៊ុនផលិតស្រាបៀរហូឡង់បានដកម៉ាក Heineken របស់ខ្លួនចេញពីប្រទេសរុស្ស៊ីកាលពីឆ្នាំមុន ហើយការផលិត Amstel នឹងត្រូវលុបចោលក្នុងរយៈពេលប្រាំមួយខែ។
ក្រុមហ៊ុន Heineken បាននិយាយថា កិច្ចព្រមព្រៀងនេះ គឺគ្មានជម្រើសក្នុងការទិញអាជីវកម្មត្រឡប់មកវិញទេ រួមមានអាជ្ញាប័ណ្ណរយៈពេល 3 ឆ្នាំសម្រាប់ម៉ាកយីហោក្នុងតំបន់តូចៗមួយចំនួន ដែល Heineken នឹងមិនផ្តល់ការគាំទ្រម៉ាកយីហោ ឬទទួលបានប្រាក់ចំណូលណាមួយឡើយ។
ក្រុមហ៊ុន Arnest Group ជាម្ចាស់អាជីវកម្មវេចខ្ចប់កំប៉ុងធំមួយ និងជាក្រុមហ៊ុនផលិតថ្នាំអាសេរ៉ូលធំបំផុតរបស់រុស្ស៊ី ក៏ដូចជាការលក់គ្រឿងសំអាង និងទំនិញប្រើប្រាស់ក្នុងផ្ទះផងដែរ។
Heineken បាននិយាយថាប្រតិបត្តិការនេះនឹងមានផលប៉ះពាល់តិចតួចចំពោះ ទស្សនវិស័យពេញមួយឆ្នាំ របស់ខ្លួន ។
